வலைஞர்மடத்தில் காணியில் இருந்து 4,500 துப்பாக்கி ரவைகள் நேற்று மீட்பு!

முல்லைத்தீவு, வலைஞர்மடத்தில் உள்ள வயல் காணி ஒன்றில் நேற்று ரி – 56 வகை துப்பாக்கி ரவைகள் பெருமளவில் மீட்கப்பட்டுள்ளன.

4 ஆயிரத்து 500 துப்பாக்கி ரவைகள் இவ்வாறு மீட்கப்பட்டுள்ளன.

வலைஞர்மடம் பகுதியில் உள்ள கிறிஸ்தவ தேவாலய வீதியிலுள்ள வயல் காணி ஒன்றில் குறித்த காணி உரிமையாளர் காணியில் மண்ணை அகழ்ந்தெடுக்கும்போது துப்பாக்கி ரவை பெட்டிகள் இருந்ததை அவதானித்துள்ளார்.

அதனையடுத்து அப்பகுதியில் உள்ள கடற்படையினருக்குத் தகவல் வழங்கியுள்ளார்.

முல்லைத்தீவு பொலிஸார் சம்பவ இடத்துக்கு வந்து துப்பாக்கி ரவைகளை மீட்டெடுத்துள்ளனர்.

இதன்போது ரி – 56 வகை துப்பாக்கி ரவைகள் அடங்கிய ஆறு பெட்டிகள் மீட்கப்பட்டுள்ளன.

மொத்தமாக 4 ஆயிரத்து 500 துப்பாக்கி ரவைகள் மீட்கப்பட்டுள்ளன என்று முல்லைத்தீவு பொலிஸார் தெரிவித்துள்ளனர்.